Dua//Mangnay wala aur Denay wala

Dua ke maamlay me mai aam musalmanon ki tarah bohat ehmaq waqay hua hun. Na janay kyun dua maangtay waqt meray dil ki gehraiyun se ye khayal ubharta hai ke dua suntay waqt Allah taala sank baksh moulvi sahab ka roop dhaar letay hain, pehlay wo naak par romaal rakh letay hain phir hath me aik chimti pakar letay hain phir gandi, ghaleez, hawas-bhari aur na-jaaiz duaon ko is chimti se utha utha kar door phaink detay hain. Phir naak se romaal hataty hain. Chimti aik taraf rakh detay hain aur haath dho kar bachi kuchi saaf suthri duaon ka jaaiza letay hain. In me se bhi na-maaqool duain nikaal kar phaink detay hain aur phir baqya duaon ko aik taraf rakh detay hain ke fursat ke waqt in par ghor karain gay.

La shaoor me rachay basay huay is aitebaar ki waja se mujh aisay aam gunahgaar musalmanon ne na tou kabhi dua ke mafhoom ko samjha hai, na maangnay ke fail ko jaan hai aur na qubool karnay wali ki azmat ka raaz paya hai.

Meri apni halat ye hai ke dua ke liye hath uthanay se pehlay sochta hun ke kaheen mai itna tou maang raha ke denay walay pe bojh ho jaye? Kaheen aisi cheez tou nahi maang raha jo na-jaaiz hai, jo ghaleez hai, jis me gunaah ka ansar maujood hai. Kaheen is dua se meri taba’i hawas ka bhaid tou nahi khulta? Phir mai arz karta hun ke Ya Allah! Mai harees nahi hun, mai tujh se ziada nahi maangta. Sirf utna maang raha hun jis ki mujhay ashadd zaroorat hai aur jisay dena teray liye baar na hoga.

 

Is ke sath hi meray dil se aik halki si aawaaz aati hai. Itni halki si ke suni nahi ja sakti:

“Ya Allah! Dekh le, mai kitna acha aadmi hun. Mai ne tujh par bojh nahi daala Mai ne aisi dua nahi maangi ke tujhay naak par romaal rakhna paray, chimti uthani paray. Ya Allah dekh le aisi dua maang kar mai ne tujh par kitna ehsaan kia hai?”

Meray aik dost hain Ghulam Deen Wani. Unho ne saari umer namazon aur ibadaton me guzaar di hai lekin aaj tak wo “dua” “maangnay” aur “denay walay” ke mafhoom se waqif nahi. Wo itni khissat se duaa maangtay hain ke meray nazdeek unki dua, denay walay ki touheen ka baais hojati hai.

Un ki dua ka matan kuch aisa hota hai ke, “Ya baari taala. Beshak mujhay ziada na de lekin itna tou de ke mera guzaara hojaye. Ya Allah! Aur kia arz karun, tu malik hai, jo teri marzi.”

Mai ne baarha Ghulaam Deen Wani ko samjhanay ki koshish ki hai baari taala ke huzoor me dua maango tou usko qubool karna aa’id karnay ki koshish karo. Yun ke “Ya Baari taala! Mera kaam maangna hai, tera kaam dena hai. Tu jo bin maangay deta hai, maangnay pe kyun na dega. Zaroor dega. Baari taala! Mujha de, itna de ke phir maangnay ki haajat na rahay.” Baar’ha mai ne Wani sahab se kaha hai, “Ya tou maango aur denay walay pe poora bharosa kar ke maango aur ya naa maango. Ye kia zulm kartay ho ke maangtay bhi ho, sath hi ye bhi taakeed kartay jatay ho ke ziada na dena. Phir apni musalsal tangdasti pe rotay bhi rehtay ho. Ye kia tukk hai ke aik taraf maangtay ho dusri taraf dena ya na dena uski marzi pe chor detay ho, ke aagay Tu malik hai, jo teri marzi hai.”

Pehli martaba jab main ne aik shaks ko mangtay huay suna tou hairaan reh gaya. Daata ka mazaar tha. Aik jatta dhari faqeer aya. Yun dakhil hua jesay maqrooz ke ghar qarz-khuwa aya ho. Us ne daata ko lalkara:  “Jo daata bana betha hai tou de! dekh teray dawar par maangnay wala aaya hai. Dey. Dus crore rupay ka sawal hai. “Dus crore rupay, dus crore rupay, dus crore rupay” Chillata hua wo dusray darwazay se bahar nikal gaya.

“Aray!” Mai bhonchka reh gaya. “Ye jatta dhari ho kar rupya maang raha tha! Apni is maang par nidamat nahi mehsoos kar raha tha. Hamari tarah data ko khasees moulvi nahi samajh raha tha. Ye nahi samajh raha tha ke data naak par romaal rakh lengay, hath me chimti utha lengay.”

“Aray!” Goya meri aankhain khul gaeen. Zindagi me mai ne pehli martaba sachcha maangnay wala dekha tha.. Pehli martaba.. Aik aisa shaks jo mangnay ki azmat se waqif tha, jo daata ko daata samajhta tha.

Labbaik, Mumtaz Mufti. ❤

Advertisements

One thought on “Dua//Mangnay wala aur Denay wala

  1. Hiba says:

    This was really amusing to read, also I agree with this writer so much! Dua yakeen ke saath maangi jaati hai. Iss imaan ke saath Ki Allah dene wala hai Aur woh zaroor dega…
    Anyway, I love how the writer explained his views.
    Even about how we ask for filthy things from Allah…

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s